لماذا يخجل اهل جدة من لهجتهم ؟ موضوع مهم للنقاش

يمكن الكلام دا خاص بالأولاد او الشباب اما بالنسبه لنا نحن البنات بصراحه نتكلم جداوي وكمان نتمزع بالكلام الجداوي حتى صديقاتنا اللي من القصيم يتكلموا زينا كده ولا نحس بأنه الكلام النجدي يعني يدل على المستوى العالي ليه هو فرنسي ياخويه بس انا اعرف انو شباب جده عندهم عقدة الامراء مع ان الامراء لهم طريقه كلام مختلفه عن الكل كده كلامهم مكس من هنا وهناك شي سبيشل شي مرتب واحب اقول للجميع سواء الشباب اتكلمو نجدي ولا جداوي اهم شي اش بيقولوا

انا اقولك حاجه الولد لما يغير لهجته يكون بسبب اللي حوله لانو في الاصل ما عندو شخصيه

________________________

من جد مين قال انو احنا نستحي من لهجتنا بالعكس احس اني ماقدر اغيرها لو ايش صار وفين رحت
اقلكم حكايه مره وحده اعرفها سافرت وجات وحده كويتيه سمعتها وهي تتكلم وعرفت انها من جده بس فجات تقلها اتكلمي ابى اسمع كلامك زي طاش ماطاش قالت لها انهم يبالغو يعني عشان يضحكو الناس وكدا تقلها لا ابدا انتو كلامكم زي طاش ماطاش قالتلها طيب انتي كويتيه ولسه كمان صغيره ليش لابسه نقاب ومتغطيه مع انو المسلسلات الكويتيه تبين انو الكويتيات كوول ومافي احد يغطي بالذات الصغار قامت قالت لا بالعكس في كثير زي يعني مو شرط قامت قالتلها شفتي انو مو كل شي تشوفيه يكون واقع ....
وشكرا على الموضوع

مشكورة على الموضوع وبصراحة الموضوع مرة حلو
وانا عن نفسي افتخر بلهجتي ومهما سار ما اتكلم غيرلهجتي

انا انسان مقيم بجده واعشق جده وبحر جده وناس جده اما موضوع لهجة جده فهي بنظري لهجة جميلة جدا وليس بها عيب وبما اننا عرب المفروض اننا نعشق لغتنا العربية ولا اعتقد انه هناك من يخجل من لهجته الا اذا كان انسان عنده عقدة نقص بحياته . واحترامي للجميع