شوووووت!!

الفكر ضد الموت فـي كـل الاوقـات
واللـي بليّـا فكـر عايـش بتـابـوت
الصـح منـه يـدوم ويخلـد أمـوات
والاّ الغلـط مجـرد سنيـن ويـمـوت
والشعر لوما صار (ساعـي قناعـات )
يصبح حكي .. لكن على هيئة بيوت !!
والصـدق مفتـاح الكرامـة ومنجـاة
يكسيك من لبس الثناء مشلـح وكـوت
والكذب نقص عقول وفعـول واثبـات:
بان أغلـب الياقـوت ماهـو بياقـوت
والحب (أحلى شي) .. إلاّ مـع الـذات
والدار (أغلى شـي) .. إلاّ بـلا قـوت
والدين .. عز .. وهيمنة .. وانتصارات
لاصار فعل وقـول وإجهـاد وقنـوت
يوم المشايخ .. قبل عصـر الدويـلات
تنقل كفن وسـلاح ماتنقـل بشـوت !!
في وقتها ياهـل الخطـب والشعـارات
سالت دموع العز من (عين جالـوت)!!
وفي وقتنـا .. ياصانعيـن القـرارات
نضحّي بغزة علـى شـان بيـروت !!
والفرق شاسع .. ياصراع الحضـارات
والقول أكيد .. وبالأدلـة .. ومثبـوت
الماضي: أمجـاد وشمـوخ وفتوحـات
والحاضر: مهايط ومقهـى وبيلـوت !!
وأمـرّ وآدهـى .. ماهـو قـادم وآت
لاصـار واقعنـا مبهـذل وممـقـوت
يمثـل الأمـة فـي الامـة عصابـات
وعلى خراب بيوت تتعمـر بيـوت !!
جلسات سريّـة علـى شـان جلسـات
تفوّت اللـي مستحيـل انـه يفـوت !!
واللعب واضح فـي جميـع المجـالات
بتشوت ؟! صلح لي أصلح لك اتشوت !!
والخيـر بيّـن فـي وجيـه البشـوات
والشعب مستهلـك ومتعـب ومكبـوت
حرية الراي : اختصـاص القيـادات !!
وحنا تخصص ذل وانصات وسكـوت!
ياصاحبي .. خل القصص والحكايـات
وش ميزة التوت ؟ ان فقد لذة التوت ؟!
إن مت ! من قول الحقايق .. سهـالات
على الأقل تدري على ويش بتمـوت !
والمشكله ماهيب في كثـر الاصـوات
المشكله لاصار مال العقـل صـوت !

ياهلا والله نورتو
يسلمووو على مروركم