حصل في مثل هذا اليوم من العام 1984 للميلاد
ظهور طختي على وجه الارض وفي الساعة 8:30 صباحا في مستشفى خالد ادريس
وقام بالتقاط طختي حبيبة قلبي ( مسيتو الفلبينيه ) تصدقوا هدي الفلبينيه جابتني انا واخواني كلنا
وقبل سنتين جاتني اخت صغيره ربي يحفظها ولمن رحت لمامتي في المستشفى طبعا امي مستحيل
تولد في مستشفى غير خالد ادريس ( مساله عاطفيه ونفسيه ) المهم اني لقيت مسيتو والله ياعيال
جلست تسلم عليا ومو مصدقه انه انا اللي قبل اكتر من 22 سنه ولدتني حزنتني والله 
المهم اليوم ماي بيرث داي والمشكله امي ماتتدكر عيد ميلادي الا ادا اتغير التقويم كل سنه كدا
تقول (( يالله السنه انتهت وعيد ميلاد سعود راح علينا )) وانا متعود طبعا والعب وقتها دور الانسان المهمل اللي ماله داعي في البيت وماحد يحبه وشوفوا كيف امي وقت تشوفني كدا
ايش ابغى وقتها اطلع الطلبات حقت السنه ككلها تخرج وقتها مااتقولي لا وانا مااقصر اكبر استغلالي خصوصا في المواقف الحرجه والله اني من جد استغلالي الله يسامحني
بقلكم على قصة قصيره بس بوريكم نبذه عن المواقف اللي ماافوتها بدون فائده
مثلا قبل تقريبا 8 سنوات ماتت جدتي لاتخافون ماحبكي قيدها تفتفتت في القبر المهم
ابويا اصغر واحد في اولادها آخر العنقود يعني اتخيلوا توهم دفنوها واحنا في العزا كنت اباخدد فلوس من ابويا وماني عارف كيف اجيه وهوا مسوي فيها حزين على امه قمت جيته بمنظر المحطم التعيس وناظرت فيه بنظرة الحزن وانا من جوه شوي واضحك واقول فنفسي عسى الحركه تمشي
المهم قلت لابوي (( ابويا جدتي ماتت وانا ابتصدق عنها دحين مررررره دحين ماابنام اليوم الا وانا فال امها بالفلوس قصدي الا وانا متصدق عنها )) ناظرني ابويا بنظرة الحزن على فقد امه مع انها ماتت عجوز هافيه اخذت عمرها ولو جلست بتاخد عمري معها (( الله يرحمها امديها تعطس فقبرها وانا اتكلم عليها )) المهم قام ابويا وطلع خمسمية ريال وقالي بكل فخر (( خد ياولدي اصرفها ووزعها على المحتاجين )) وناظرت فيه انا بنظرة الولد المطيع وقلت حاضر ابويا وترى جدتي مو خساره حتى الف ريال فيها بس هات الخمسميه خلينا نشوفلنا حل
ياعيال لاتقولو لاحد بالله فكونا
المهم ماادري ايش جالس اقول من اول بس هدا اللي حصل في مثل هذا اليوم
سلااااااااااام
رد: موضوع فريد من نوعه,,قل ماذا حصل لك في مثل هذا اليوم
العرض العادي
