يا حبيب العمر

حبيب العمر

إستشير القلب دامك تشعر إنك مستشار = ولاتظن عيوني أبدا غير عينك تستشير

لاتحسب إني أراوغ أو أمانع أي قرار = دام حبك بي خيالي خل يصير اللي يصير

والقناع اللي لبسته مايغير هالمسار = كل واحد في غرامه يمتلك قلب وضمير

جيت لك موت وتحدي .. لو تبي جيت إنتحار = المهم إبقى عشانك دام حبك بي خطير

كيفها عيونك حبيبي لو تناظر بإحتقار = دام أنا بعينك حقيره أعشقك يا أعظم حقير

خلها تطول المسافه ما أمل الإنتظار = دام أشوفك في خيالي عاشقٍ ماله نظير

ودامها صارت تحدي ما أحب لعب الصغار = وأبتدي أقنع عيوني بس تشوفك هي كبير

وأعلن سيوف التحدي وأرفعك فوق الكبار = وكل شامخ في طريقك أجبره يبقى صغير

وساحة الشعر بمداها تصبح لعينك قطار = كلها تهون لقصيدك بس تهنى بالمسير

دوم أنا أبقى قويه .. بس أحس بإنكسار = تدري وش يعني شموخٍ داخله يبقى كسير

تدري وش يعني عظيمٍ .. تشعره بالإنهيار = تدري وش يعني غرامٍ مابه إنسانٍ يغير

تدري وش يعني حبيبٍ راح عنك وإستدار = تدري وش يعني بروده يشعلك نار السعير

كلها تهون لعيونك وأشعر إني بإنتصار = وأمسك النار بيديني ولا أفكر بالمصير

دامك الموت الحقيقي ياحلاة الإحتضار = تزرع الشوك بطريقي أمشي وأتخيل حرير

التحدي هو غرامي ولا أعرف الإنحدار = ولذة السكر هوايه تخجل الوضع المرير

شفتني كيف أنتهي بك شفتني ياأحلى مرار = لجلك أجبر هالمربع ياعذابي يستدير

ولجلك عيون البرايا كلها مني تغار = وكل ماسافر مدينه خافقي لعينك سفير

تمطر الدنيا غيومٍ برقها يضوي شرار = والصحاري كلها لك وردةٍ وسط الغدير

والمسافه لو بعيده ما أمل الإختصار = ماتهم الجاذبيه دام أنا لعينك أطير

كلهم قالوا غريبه وين عقلك .. كيف طار = قلت أنا للي خذاني وإبتعد عني كثير

يستشير الكون لكن مايفيد المستشار = هو عقب نظرة عيوني .. به عيونٍ يستشير